Штип може да се пофали дека најголемата компанија со седиште во најголемиот град на македонскиот исток е домашно поседувана. И не само тоа. Основана е локално, домашен гринфилд и понатаму расте. Во штипската економија значајно место имаат странските гринфилд инвестиции, но и други домашни реномирани и етаблирани компании.
Штип е најголемиот град во Источна Македонија. Градот под Исарот, ридот што го дели градот и славното Ново Село, бил и е политички, економски, културен, музички и спортски, образовен и здравен центар на целиот македонски исток. Штип има универзитет, клинички центар, еден од најпознатите музички фестивали, го има најслушаното национално радио. Штип е и гурмански центар зашто цела Македонија, но и регионот ја знаат, признаваат и конзумираат штипската пастрмајлија. Штип секогаш бил источниот светилник за македонската национална борба за независност. Особено од времето кога во него учителствувал Гоце Делчев, најголемиот наш револуционер, а во него се родени и делувале и најголемиот војвода на организацијата, контроверзниот Тодор Александров и „гуруто“ на балканскиот тероризам и веројатно најконтроверзниот роден Македонец со бугарска самосвест – Ванчо Михајлов. Штип е горд како град во кој е роден еден од најголемите македонски поети Ацо Шопов.
Во најновата историја на независна Македонија Штип е градот што дал еден претседател и двајца премиери на нашата независна држава, еден голем генерал, еден светски признат кардио хирург, но и мнозина општественици, дејци и творци. Штип е градот што изнедрил носител на олимписки медал во борење слободен стил, а го трасирал и патот на ексјугословенската фудбалска легенда Шекуларац кој играл во штипска „Брегалница“. Економски гледано Штип не е македонски Манчестер иако некогаш и бил. Штипската економија порано била базирана на текстилните гиганти и нивните добавувачи и супортери. Сега сликата е многу поразлична, иако Штип и сега има силна текстилна индустрија. Во последниве години економска локомотива на штипската композиција е силната метална индустрија, национален кабелски и интернет оператор, големи дистрибутерски и трговски компании. Штип има и неколку големи и силни компании за логистика и за товарен транспорт.
Кои се најголемите штипски компании?
Индустријата за метални конструкциии „Актива“ е број еден според приходи. Од регистарот на компании кои 2024 година ја завршиле со добивка таа е фирма и со најголем број вработени, вкупно 526 лица на крај на 2024 година. За нијанса помал приход има странската инвестиција за термички компоненти наменети за бојлери – „Кондево“ од Италија.По „Актива“ најголема штипска домашно и локално поседувана компанија е „Оаза Екстра – Скопско“ која интегрира производство, дистрибуција и трговија, угостителство.
Во најголемите пет штипски компании според приход се уште странскиот гринфилид „Техникал Текстајлс“ кој е специјализиран за примена на фиберглас во авионска, градежна и автомобилска индустрија и веројатно најголемата компанија за логистика на македонскиот исток – Квенбергер. Во најголемите десет штипски компании лани покрај етаблираните „Телекабел“, кондиторската индустрија „Стел Импекс“, „Мегапласт“ – специјалистите за сите комбинации стакло со ПВЦ и алуминиум и глобално популарните „Мејер и Мејер“ вреди да се напомене и локалната иноваторска фирма КТМ Енерџи солушнс специјализирана за проектирање и инсталација на централи за производство на струја од обновливи извори.
Р.Ф.
