„Стрип Трип“, единствениот фестивал за стрипови во земјава, кој годинава се одржува во Скопје од 6 до 8 јуни, објави повик за волонтери. Организаторите од здружението „Макстрипови“ објавија повик како и минатата година, за дел од организациските работи е предвидено да учествуваат и неплатени волонтери, кои би помогнале во завршните подготовки на фестивалот и при неговото спроведување. Покрај можноста да придонесат кон заедницата, волонтерите ќе имаат можност да се запознаат со претставниците на стрип сцената, да се забавуваат и да стекнат едно поинакво искуство. „Претходно волонтерско искуство не е неопходно, но љубов кон стрипот дефинитивно е!“ – нагласуваат организаторите на фестивалот кој ќе се одржи во Младинскиот културен центар во Скопје.
За пријавување и повеќе информации се врши преку електронска пошта на [email protected]. Организаторите на „Стрип Трип“ во меѓувреме објавија и повеќе информации и за наградниот конкурс за краток стрип, кој завршува на 25 мај. Првата награда ќе биде парична во износ од 10.000 денари, додека втората и третата награда се ваучери во стрип-книжарницата „Бункер“ во износ од 6.000 и 3.000 денари. Досега објавената програма за годинашното издание на „СТРИП ТРИП“ предвидува гостувања на низа современи автори и дејци од областа на стрипот. Меѓу нив се Рајнхард Клајст (Германија), Гани Сундури (Косово), Марко Дјешка (Хрватска) и македонските уметници Наташа Андонова, Филип Алексовски, Александар Сотировски, Матеј Богдановски, Смиле Цветановски, и Стефан Николовски. Извор: Новинска агенција МЕТА
