Алијанса за Албанците продолжува да биде дел од Владата, бидејќи огромното мнозинство функционери продолжуваат да одат на работа, изјави вицепремиерот Арбен Фетаи во гостување на тв 21.
Според него, оставката на само неколку поединци од нивните должности и на Арбен Таравари од Министерството за здравство не ја води Алијанса во опозиција.
– Делот на AА во Владата го сочинуваат околу 50 државни функционери кои се назначени на одредени позиции, најмалку 50, а можеби и повеќе. Гледам дека од нив, само тројца досега поднеле оставки, за тројца се знае дека јавно се изјасниле, за останатите не знам никого што ја напуштил Владата. Знам дека сите други продолжуваат да одат на своите работни места – вели Фетаи.Фетаи, кој е претседател на Собранието на Алијанса за Албанците, состанокот за претседателството на партијата што се одржало токму за ова прашање го нарече циркус.
Тој посочи дека не му рекол „не“ на Арбен Таравари, туку рекол „не“ на план кој, според него, не е план на Алијансата за Албанците.
– Реков „не“ на одлука што не е одлука, бидејќи не добила форма на одлука во партиските тела. Како прва точка, тоа не беше состанок на раководството, туку измислен формат на кој присуствуваа членови на партиското раководство, функционери и раководители на ограноци. Овој формат не постои никаде во статутот на партијата. Партиското собрание е единственото тело одговорно за донесување такви одлуки во АА. Па затоа решив да не легитимирам циркус – изјави Арбен Фетаи.
