После виралната и вистинска снимка од личност облечена во костум на Пикачу која бега од полицијата во текот на протестот во Турција, на социјалните мрежи се појави и наводна фотографија каде полицијата го апси Пикачу, додека на земјата лежи Бетмен. Но, оваа фотографија што се појави и во Северна Македонија, е креирана со вештачка интелигенција Рецензираме објава на социјалната мрежа Фејсбук во која се споделува фотографија и пишува: Пикачу бил уапсен од турската полиција на протестите во Турција…втф Фотографијата што се споделува е креирана со вештачка интелигенција и не претставува реална фотографија. Откако беше уапсен градоначалникот на Истанбул Екрем Имамоглу, главниот политички противник на претседателот Реџеп Таип Ердоган, во Турција почнаа масовни протести. Во текот на овие демонстрации снимка од лице облечено во костим од Пикачу, стана вирална. На снимката лицето бега од полицијата. Видеото е снимено во тек на протестите во Анталија, а негов автор е Исмаил Кочероглу, фоторепортер од универзитетот Акдениз. Но, на социјалните мрежи набрзо по ова вистинско видео од оваа сцена, се појавија слики од Пикачу, наводно од неговото приведување и апсење од полицијата, кои корисниците на социјалните мрежи ги споделуваа како да се вистински.
Таков е случајот и со фотографијата од објавата што ја рецензираме, која е креирана со вештачка интелигенција. На неа се гледа како наводно лицето облечено во костум од Пикачу се обидува да го „спаси“ Бетмен кој лежи на земјата. Корисниците на Инстаграм кои креираат фотографии со вештачка интелигенција, и самите објавуваат дека се работи за содржина генерирана со вештачка интелигенција.
Во еден коментар во специјализиран медиум, исто така се потврдува дека конкретната фотографија како и многу други слични фотографии од оваа „серија“ со супер херои содржат фиктивни карактери кои дополнително ја дисторзираат реалноста и се креирани со вештачка интелигенција. Слични фотографии креирани со вештачка интелигенција се предмет на рецензии на проверувачите на факти ширум светот, како на пример овде и овде. Поради сите горенаведени факти објавата што ја рецензираме ја оценуваме како објава која е со изменета содржина. Извор: Новинска агенција МЕТА
