По повод Светскиот ден на свесноста за аутизмот, во младинскиот центар „Матично“ во Општина Центар е поставена изложбата „Моите херои“, на млада и талентирана авторка – Јана Иванова, ученичка во четврто одделение во ООУ „Димитар Миладинов“. Оваа изложба не само што ја истакнува дарбата на Јана, туку претставува и силна порака за важноста на инклузивниот пристап во општеството. Општина Центар активно се залага за создавање средина во која сите деца ќе имаат можност да го изразат својот талент и да добијат соодветна поддршка. „Изложбата ја нагласува важноста на заедничките напори кои ги правиме сите заедно, семејствата, училиштата и општината. Ангажирањето на личните асистенти во образовниот процес е проект на кој сме особено горди, а тука се сензорните соби во основните училишта, пристапната инфраструктура која постојано ја доградуваме. Ги покануваме сите граѓани да ја посетат изложбата, која ќе биде отворена до 30 април, секој работен ден од 10 до 16 часот, и да дадат поддршка на оваа исклучителна млада уметница”, истакна градоначалникот Герасимовски. За реализацијата на овој настан придонесоа и „Комерцијална банка“, „Еуро-Фарм“, „Стокомак“, „Авицена – дијагностика“ и „Алкалоид“.
