Пресметката меѓу обвинителите и персоналот на земјоделските агенции одговорни за исплата на европските субвенции траеше цел ден и цела ноќ. Двајца обвинители на Европското јавно обвинителство (ЕЈО), заедно со 20 полицајци, влегоа во грчката земјоделска агенција ОПЕКЕПЕ во Атина во 9:30 часот наутро со намера да ги земат бараните податоци во истрагата за измама со земјоделски стимулации. Во исто време, паралелно се одвиваа претреси на другите две локации на регионалните администрации на ОПЕКЕПЕ, како и во куќите на високи функционери и резиденцијата на поранешниот потпретседател на организацијата. Но, само во Атина потрагата се претвори во напната ситуација. На обвинителите на ЕЈО им беше физички одбиен пристап до мобилните телефони, компјутерите, дисковите, серверите и „облакот“ на агенцијата од страна на вработените во OПEKEПE, како и до сите побарани податоци, со изговор дека техничките советници во моментов се отсутни. По неколку часа расправии, обвинителите ги замолуваат вработените да потпишат заклетва во која наведуваат дека навистина не се во можност да ѝ ги достават бараните докази на истрагата. Вработените одбиваат.
Потоа обвинителите бараат од претседателот на ОПЕКЕПЕ, Никос Салатас, да ја потпише истата изјава или ќе се соочи со апсење поради попречување на истрагата. Салатас се согласи да соработува, а обвинителите ја напуштија грчката земјоделска агенција во 4 часот наутро со сè што им беше потребно. Иако овој застој се одвиваше во зградата, тоа не го спречи ОПЕКЕПЕ да даде јавна изјава дека целосно соработуваат во истрагата на ЕЈО. Ова го налути ЕЈО, кое еден ден подоцна издаде остра изјава во која ја обвинува агенцијата за несоработка и сугерираше можни систематски измамнички практики во кои се вклучени службеници на ОПЕКЕПЕ. „Собирањето на дигитални докази во седиштето на OPEKEPE се покажа како особено предизвикувачко и беше значително одложено до 4:00 часот утрово“, соопшти ЕЈО.
Грчката земјоделска агенција одговори на овие напади од страна на ЕЈО, барајќи од европските обвинители веднаш да ги повлечат своите обвинувања, во спротивно ќе преземат правни мерки за да го заштитат својот углед. По оваа ескалација, Министерството за рурален развој реагираше и го разреши Никос Салатас од функцијата раководител на ОПЕКЕПЕ. Тој самиот одби да поднесе оставка, тврдејќи дека го брани интегритетот на агенцијата, пишува Политико. Во интервју по неговото отпуштање, Салатас продолжи да тврди дека тие соработувале од нивна страна, но дека за сè е виновен обвинителот на ЕЈО кој напишал остра изјава против ОПЕКЕПЕ, обвинувајќи го за „сериозна клевета насочена против нашата земја“. Реагираше и Лаура Ковеси
Главниот европски обвинител Лаура Ковеси ветува дека ќе ја продолжи истрагата за наводна голема измама поврзана со огромниот земјоделски буџет на ЕУ во Грција, и покрај она што го опишува како „напади“ и „заплашување“ на нејзиниот персонал. ЕЈО работи на десетици случаи во кои грчки граѓани добиле земјоделски средства од ЕУ за пасишта што не ги поседувале или не ги изнајмувале, или за земјоделска работа што никогаш не ја извршиле, лишувајќи ги вистинските земјоделци од парите што ги заслужуваат. „Го поздравувам одговорот на грчките власти на неодамнешниот настан во ОПЕКЕПЕ, со цел да се зачува ефикасна соработка со Европското јавно обвинителство. Би сакала да ја уверам јавноста дека ЕЈО вредно и непристрасно ќе продолжи со својата работа за утврдување на вистината, без оглед на нападите и заплашувањето на своите обвинители. Верувам дека непосредната цел на овие обиди е да се одвлече вниманието на јавноста од она што навистина е во прашање во овој случај: Дали имало организирана измама и корупција во земјоделските субвенции, да или не?“ рече Лаура Ковеси. ОПЕКЕПЕ е под надзор на Европската Унија од септември 2024 година поради непочитување на оперативните стандарди. Сега агенцијата ризикува да го изгуби сертификатот за управување со средствата на ЕУ, што би можело да се случи во јули кога властите на ЕУ ќе ја посетат Атина за да го следат напредокот (nezavisen.mk)
