Од Хелсиншкиот комитет велат дека граѓаните очекуваат по трагедијата што се случи во Кочани, целокупниот систем, вклучително и нивните избраници да придонесат кон борбата против корупцијата. „Се навршија речиси две недели од трагедијата во Кочани, а Собранието уште ги одложува своите седници, меѓу кои и седницата за пратенички прашања. Неприфатливо и неодговорно е пратениците да не одржуваат седници во време на ваква трагедија кога граѓаните очекуваат одговори, кога треба да се анализира системот и да се договараат следните чекори што би можеле да ги преземе Собранието во рамките на своите надлежности“, вели соопштение од Хелсиншки комитет. Оттаму потсетуваат дека законодавната функција на Собранието е само една од основните уставни функции кои ги има тоа.
„Собранието има и претставничка и надзорна функција, а пратеничките прашања се една од основните форми на надзор над работењето на Владата и другите носители на јавни функции. Собранието има механизми преку кои може да дејствува како што е формирање на постојани и привремени работни тела за секое прашање од јавен интерес. Во конкретниот случај, според член 76 од Уставот, Собранието може да се формира анкетна комисија за сите области и за секое прашање од јавен интерес и нејзините наоди можат да претставуваат основа за утврдување на одговорност за носителите на јавни функции“, се наведува во соопштението.
Од Хелсиншкиот комитет велат дека граѓаните очекуваат по трагедијата што се случи во Кочани, целокупниот систем, вклучително и нивните избраници да придонесат кон борбата против корупцијата и за исправање на неправилностите и големата поделеност во општеството и притоа ќе бидат ефикасни и бескомпромисни. „Граѓаните од своите избраници, како и од другите носители на јавни функции, бараат системот да функционира без привилегии за никого и законите да важат за сите подеднакво“, велат оттаму. Извор: Новинска агенција МЕТА
