Резултатите од анализите на ДИЖС не покажуваат вредности на цијанид кои се стотици пати повисоки, туку помалку од двапати. Вредности на цијанид неколку стотици пати над дозволените во Крива Река нема, тврди директорката на Државниот инспекторат за животна средина, Ивана Гиновска, која му порача на градоначалникот на Крива Паланка, Сашко Митовски дека за ширење на паника кривично се одговара. Гиновска, на денешната прес-конференција рече дека Државниот инспекторат за животна средина донел решение со кое побарал Булмак и рудникот Тораница да преземат мерки за проценка на штетите врз животната средина што ги предизвика истекувањето на технолошка вода и придонесе за заматување на реката Крива Река. Проценката ќе треба да ја направи независен проценител и ќе треба да ги покаже колкави биле влијанијата врз водата, почвата и живиот свет и дали ќе има последици врз животната средина. Врз основа на тоа ќе се донесе одлука дали ќе има и кривична пријава за компанијата.
Гиновска информираше дека на Булмак му е изречена казна од 180.000 до 200.000 евра и дополнителни 10.000 евра за одговорното лица во компанијата и демантираше дека дента на хаваријата инспектори на ДИЖС немало на терен. Таа уверуваше дека инспекторатот работел на предметот со голема сериозност, но и дека тој се искористил заради дневно политички препукувања додека сè уште не бил затворен. „Ја разбирам загриженоста на јавноста, но Инспекторатот работи на предметот со голема посветеност и не е во ред од страна на поединци да се поткопува довербата во институциите. Јавноста ќе биде информирана за сите следни чекори кои ќе бидат преземени. Делото екоцид не се докажува со земање на еден литар вода од една локација, туку со сеопфатна и темелна анализа. ДИЖС има малку луѓе, но сите се со искуство. Предметот нема да се остави на половина пат и ќе има правна разрешница, а доколку има последици за животната средина никој нема да биде поштеден и ќе биде поднесена кривична пријава за рудникот“, рече Гиновска. Таа потврди дека инспекторите на ДИЖС кои дента излегле на терен не земале мостри од загадената вода и посочи дека тие одлучуваат според сопственото убедување како ќе постапат во одреден случај. Анализи биле направени дополнително на мостри земени од шест точки, а резултатите се дадени до Јавното Обвинителство во Куманово каде што е веќе отворен предмет за случајот. Резултатите од овие анализи, вели Гиновска, не покажуваат вредности на цијанид кои се стотици пати повисоки, туку помалку од двапати.
Гиновска информираше и дека побарала од Комисијата за спречување на корупцијата да испита и дали има судир на интереси за надлежните инспектори Зоран Стојнев, кој работел во Тораница до 2022 година и на Благој Игновски, чија сопруга работела во рудник, но во Злетово до 2018 година. Инцидентот во рудникот за олово и цинк Тораница од Крива Паланка се случи на средината на минатиот месец кога пукнала цевката преку која се доведува технолошката вода од таложникот за јамски води до погонот за флотација. Водата која завршила во Крива река предизвика заматување и обојување во сива боја на речните води. Тогаш градоначалникот на Крива Паланка, Сашко Митовски и риболовно друштво од градот, заради сомневање дека се случува големо загадување ангажираа приватна лабораторија за испитување на мостри од реката заради присуство на цијанид, олово и цинк. Извор: Новинска агенција МЕТА
