Центарот за управување со кризи (ЦУК) информира дека имало вкупно 2 007 повици на Единствениот повикувачки број за итни случаи 112 во ЦУК во последното деноноќие, од коишто „реални“ повици биле 60,89%, а 39,11% биле за други потреби на граѓаните што не биле итни. Кон Полиција биле упатени 64,14%, кон Итната медицинска помош 27,82%, а кон пожарникарите 2,76%, од реалните повици кон 112 во ЦУК. Инаку, имало 808 повици за итни случаи на 112 за во ЦУК, што се вкупен збир од тие што биле за комбинирано решавање од „реалните“ повици и на тие што се именувани како „неитни повици“. Сите тие биле предмет на примање, на обработка во ЦУК, а и на директно поединечно или комбинирано со повеќе субјекти информирање и координирање, за нивно решавање со институции и служби во Системот за управување со кризи (СУК).
Немало пожари на отворено во последното деноноќие, освен интервенцијата за догасување на градската депонија кај Демир Хисар, а пожарникарите паралелно гаснеле и други пожари во населени места и сите биле изгаснати. Но, при интервенција во населено место на еден од велешките пожарникари му се слошило по што е згрижен со итна медицинска помош. Конкретно, Регионалниот центар за управување со кризи (РЦУК) Велес, ја пренесува информацијата од ТППЕ Велес, дека од 20.52 до 22.45 часот, со 2 ПП возила и 6 пожарникари интервенирале на запалена штала и дел од кров во с. Башино Село. При интервенцијата на еден од пожарникарите му се слошило за што е однесен со итна медицинска помош на Општа болница во Велес. РЦУК Битола, ја пренесува информацијата од Територијалната противпожарна единица (ТППЕ) Демир Хисар дека вчера (24.04.2025 година) било завршено со затрупување со земја на опожарениот дел од градската депонија кај Демир Хисар. Интервенирале 3 пожарникари со 2 ПП возила, ЈКП „Комуналец“ – Демир Хисар 5 работници со 1 градежна машина и 1 градежна машина од приватен субјект. Пожарот бил локализиран во текот на вчерашниот ден и немало чадење. ТППЕ Демир Хисар по уште една проверка во текот на денешниот ден ќе го „затвори“ настанот. Инаку, пожарникарите од ТППЕ Битола, во изминатото деноноќие имале уште една помала интервенција.
На 112 во ЦУК беа примени повеќе пријави за итни случаи заради вчерашните обилни врнежи. РЦУК Скопје известува за добиена пријава од граѓанин дека секундарниот канал кај УСЈЕ не е исчистен, и поради зголемоно количество на вода од дождот истиот е полн со вода и постои потенцијална опасност истиот да се излее и предизвика штета. Поради тоа од РЦУК Скопје е стапено во контакт со Град Скопје од каде што известиле дека веднаш од нивна страна ќе испратат луѓе да утврдат во каква состојба е каналот. Истовремено, од ЦУк биле информирани и во АД Водостопанство кои известиле дека не се работи за канал што е во нивна надлежност, но истите би интервенирале доколку Град Скопје го побара тоа од нив. Во 20.15 часот, преку 112 во ЦУК е добиена пријава за големо количество на вода по обилниот дожд што го погоди Скопје вчера попладне, на улица „Фуштанска“ 14А во скопската населба „Ченто“ (Општина Гази Баба).Според првите информации биле поплавени подрумските простории на повеќе приватни куќи долж улицата. Како што се наведува водата не попречува сообраќај. Нема повредени лица. За ова веднаш од ЦУК е известена Општина Гази баба и СВР Скопје за понатамошна постaпка.
РЦУК Куманово, известува дека во изминатото деноноќие ТППЕ Кратово со 2 пожарникара и 2 ПП возила имале техничка интервенција за испумпување вода од поплавен приватен магацински простор во близина на ЈП „Национални шуми“ – Кратово. Причина за поплавата е затната атмосферска канализација од пороен дожд. РЦУК Охрид, известува дека преку Единствениот повикувачки број 112 за итни случаи во 21.27 часот, била добиена пријава дека поради поројниот дожд имаат проблем со фекалната канализација којашто им го поплавила влезот во зградата на ул.„Карпош Војвода“. За ова веднаш е известена ЈП „Нискоградба“ -Охрид и лице за контак од Кризниот штаб на Општина Охрид за понатамошна постапка. РЦУК –Тетово известува дека преку 112 во ЦУК во 23.19 часот, е добиена пријава за големи одрони на камења на патниот правец Маврово, Ростуше – Дебар на повеќе места. За ова, од ЦУК, веднаш е известено ЈП за одржување и заштита на магистрални и регионални патишта за негова понатамошна постапка. Сите итни случаи се пријавуваат на 112 во ЦУК, особено кога граѓаните имаат животозагрозувачки ситуации. Истовремено, ЦУК информира дека е корисно да се следат препораките и информациите од медиумите за превенција, а и за реагирање при итни случаи.
1м.
