Чилеанската влада во среда објави дека до парламентот доставила закон за легализација на абортусот до 14-тата недела од бременоста, што беше предизборна најава од претседателот Габриел Бориќ, кој дојде на власт во 2022 година. „Триесет и шест години откако терапевтскиот абортус беше забранет во нашата земја со декрет на воената диктатура, денес ќе отвориме дебата во парламентот“, изјави министерката за права на жените Антонија Орелана за време на прес-конференција. Се однесуваше на мерка преземена од диктатурата на Аугусто Пиноче (1973-1990) непосредно пред предавањето на власта на демократски избрана влада.
Повеќе од 50 години, во 1989 година, абортусот беше дозволен во Чиле во случаи кога животот на бремената жена е во опасност или ако фетусот нема шанси да преживее. Сепак, кратко пред да ја напушти власта, Пиноче наредил забрана на абортусот во сите околности, мерка што подоцна останала на сила под притисок од Католичката црква и конзервативните организации. Од 2017 година, абортусот е дозволен во латиноамериканската држава само во случаи кога животот на бремената мајка, или на фетусот е во опасност, како и во случаи кога бременоста е резултат на силување. Нацрт-законот на владата на Бориќ ќе треба да ги надмине пречките во парламентот, бидејќи претседателот нема мнозинство во ниту еден дом, а опозицијата отфрла какво било проширување на правото на абортус.
Министерката Орелана призна дека би било „наивно“ да се претпостави дека законот ќе биде ставен на гласање пред да заврши мандатот на владата на Бориќ на крајот на март 2026 година. Декриминализацијата на абортусот е историско барање на феминистичките колективи во Чиле.
Според еден центар за истражување на јавното мислење, 34% од чилеанската популација верува дека абортусот треба да биде избор за засегнатата жена во секој случај, додека 50% веруваат дека тој треба да биде дозволен само под одредени услови. Во 2022 година, предлогот за нов Устав, кој би го заменил сегашниот, наследство од диктатурата на Пиноче, и кој предвидуваше општа дозвола за вештачко прекинување на бременоста, беше отфрлен од граѓаните на референдум. Тој беше изготвен од уставотворно собрание чии членови беа претежно левичари и беа поддржани од претседателот Бориќ.
