Денес одбележуваме јубилеј на еден од столбовите на Универзитетот „Св. Кирил и Методиј“. Еден од најстарите три факултети во Скопје, кој од основањето и започнувањето со работа, перманентно се организира и усовршува како комплетна наставно-научна установа. Тој денеска е меѓу водечките високообразовни институции кои активно ги следат глобалните трендови во областите во кои делуваат, рече министерот за образование и наука Јетон Шаќири за време на манифестацијата организирана по повод 75 години постоење на Факултетот за шумарски науки, пејзажна архитектура и екоинженеринг „Ханс Ем“. „Факултетот има поставено високи академски стандарди за стекнување на знаења и вештини во согласност со потребите на општеството и проектираниот национален развој. Наставно научниот персонал е за секоја пофалба – максимално посветен на образовниот процес и активен во научно – истражувачката дејност“, рече Шаќири.
Тој шотенцираше дека на факултетот се едуцира кадар кој е навистина потребен и изрази надеж дека интересот за овој тип на студии ќе расте во иднина, за што, како што рече, во координација со Министерството за земјоделство, шумарство и водостопанство, од оваа година се воведува нов тип на стипендии за студенти запишани на студии од областа на шумарските науки. „Стипендиите се стимулативни, затоа што износот е 18.000 денари на месечно ниво, за 9 месеци во годината. И тоа е одлична можност за младите, првенствено да одберат вистинска струка во која ќе можат лесно да се вработат, а притоа, нивната едукација да биде финансиски поддржана и олеснета. Сигурен сум дека понудената квота ќе биде целосно искористена, а ние како институции ќе се задолжиме да одржиме континуитет на нивното доделување секоја следна академска година“, нагласи минитерот, додавајќи дека на државата и требаат сé повеќе инженери, еколози и хортикултуристи и дека тоа со заеднички напори е остварливо. Шаќири истакна дека Факултетот „Ханс Ем“ во целост ја исполнува мисијата заради која е основан и целта на образованието и посака во иднина да бидат прославени уште многу нови јубилеи и успеси.
