Турскииот суд му изрече условна казна затвор од 11 месеци на шведски новинар за навреда на претседателот Реџеп Таип Ердоган, но тој останува во затвор додека чека судење за второ, посериозно обвинение, пренесува Гардијан. Јоаким Медин, кој работи за шведскиот весник „Dagens ETC“, беше уапсен на аеродромот во Истанбул на 27 март кога допатувал за да известува за масовните протести што ја зафатија Турција. Тој бил обвинет за две различни дела: навреда на претседателот и припадност на терористичка организација, кој беше притворен еден ден подоцна во затворот Силиври во Истанбул. Откако му била изречена условна казна, судијата нареди Медин да биде ослободен, според дописникот и турската организација за човекови права MLSA, која го брани. Но, поради второто обвинение со кое се соочува – за кое сè уште не е одреден датум за судење – Медин ќе остане во притвор.
Обвинителството тврди дека Медин присуствувал на протест во Стокхолм во јануари 2023 година, каде демонстрантите обесиле кукла што го претставувала Ердоган. Таа кукла повторно се појавила неколку месеци подоцна, држејќи знаме на ЛГБТК заедницата на украсена платформа на курдски активисти на парадата на гордоста во Стокхолм. Според обвинителниот акт, кој Медин вели дека не го видел, навредливите слики биле користени за илустрација на неколку негови статии што ги објавил онлајн. Обраќајќи му се на судот преку видео врска од затворот Силиври, Медин изјави дека не бил во Шведска во време на протестот во јануари. Иако објавил линкови до статии што ги напишал за пристапувањето на Шведска во НАТО – што првично беше блокирано од Турција – Медин рече дека не бил одговорен за изборот на фотографии.
„Не бев на тој настан, бев во Германија поради работа. Не знаев за плановите за овој настан и не споделив никакви фотографии или видеа од него на социјалните мрежи,“ изјави Медин пред судот преку видео врска. „Не го навредив претседателот. Мојата задача беше да ја напишам статијата. Фотографијата ја избраа уредниците, јас само ја извршував својата работа,“ рече тој, барајќи да биде ослободен за да се врати кај својата сопруга, која е бремена седум месеци со нивното прво дете. Неговиот адвокат, Вејсел Ок, го повика судот да го ослободи. „Медин нема никаква мотивација свесно и намерно да го навреди претседателот. Процесот за НАТО беше клучен за Шведска бидејќи руски напад беше на агендата; мојот клиент известуваше за тој процес,“ изјави Ок пред судот. „Тој нема никаква врска со фотографиите; само ја сподели веста. Барам мојот клиент да биде ослободен,“ додаде адвокатот. Многу луѓе, од тинејџери до новинари, па дури и поранешна Мис на Турција, се обвинети за навреда на претседателот – дело што често се користи за да се задуши несогласувањето. Извор: Новинска агенција МЕТА
