Уште на почетокот почувствував дека полицијата се сомнева во мене. Ако биле внесени регистарските таблички од возилото „ситроен” во системот на „Сејф сити” навреме, сега во оваа судница ќе се раправаше само за убиството на велешанецот Панче Жежовски, рече Александар Ѓорчевски, таткото на убиената Вања, кој одговараше на прашања од обвинителството. Тој е обвинет за помаѓање во грабнувањето на девојчето. Беше прашан како веднаш знаел дека Вања е киднапирана и зошто токму „ситроенот“ му бил сомнителен. „Уште во 7.47 часот заедно со Зорица заклучивме дека Вања е киднапирана, бидејќи телефонот и беше исклучен, а таа нагло скршнала од рутата на движење. Таа самата не би го направила тоа, по своја волја, затоа и тогаш пријавивме во полиција“ рече Ѓорчевски. Тој појасни дека и во групата на родители од училиштето се сомневале дека Вања е киднапирана, иако во полиција сметале дека само тој мислел така.
Обвинителството оцени дека иако важел за човек кој доцнел, тој ден кога му се јавила поранешната сопруга дека Вања ја нема, сепак многу брзо се подготвил и веднаш излегол. На тоа, Александар одговори дека бил во кревет кога му се јавила и дека ја ставил на „спикер“ за да може да се облекува додека му кажувала што се случило. Обвинителката рече дека Вања во петок без исклучок секогаш одела сама, бидејќи на Миња наставата ѝ започнувала од вториот час, а таткото го потврди тоа. Така било и во петокот, кога бил првиот обид за грабнување. „Од сите обвинети од тука, само вие знаете дека Вања на 27.11.2023 година ќе оди сама на училиште“, рече обвинителката.
„Да јас знаев, а не знам што знаеле другите обвинети“, рече Ѓорчевски. Ѓорчевски уште еднаш повтори дека не ги познава другите обвинети, само слушнал за Љупчо Палевски, за кого се зборувало во соседството кога ја градел зградата „Тифани“.
