Јапонската влада денеска усвои енергетски план за следните 15 години, со цели за декарбонизација и намалување на емисиите на стакленички гасови за повеќе од 70 отсто во споредба со нивото од 2013 година. Според новиот климатски план, Јапонија има за цел да ги намали емисиите на јаглерод за 60 отсто до 2035 година од нивото од 2013 година и за 73 отсто до 2040 година. Јапонија претходно постави цел за намалување од 46 проценти до 2030 година. Планот ја заменува верзијата поставена во 2021 година и повикува на зајакнување на обновливите извори на енергија до 2040 година, притоа максимизирајќи ја употребата на нуклеарната енергија, за да се задоволи растечката побарувачка на електрична енергија во ерата на вештачката интелигенција, а истовремено да се исполнат целите за декарбонизација, пренесува Бета-АП.
Новиот енергетски план предвидува нуклеарната енергија да сочинува 20 отсто од снабдувањето со енергија на Јапонија до 2040 година, додека обновливите извори на енергија да се прошират на 40-50 отсто од речиси 23 отсто и да се намали моќноста на јаглен на 30-40 отсто од речиси 70 отсто. Енергетскиот план ја става обновливата енергија како главен извор и повикува на развој на извори на енергија од следната генерација, како што се соларни батерии и преносни соларни панели. Планот предвидува забрзување на рестартирањето на реакторите кои ги исполнуваат безбедносните стандарди по инцидентот во Фукушима и предлага изградба на реактори од следната генерација во постројките каде што постојните реактори се деактивираат.
