Јаревски: Минималната плата не е предмет на ценкање, импровизации и наметнувања

„Не е коректно вака да се настапи од страна и на синдикатите и од страна на СДСМ бидејќи минималната плата не  е предмет на трговија, не  е предмет на ценкање. Таа е производ на методологијата која што своевремено и синдикатите, истиот тој синдикат, и владата предводена од СДС од кога се договорија како па излегоа нели триумфално со дигнати раце дека направиле епохален чекор напред, и каде што се дефинираше 50% од зголемувањето на индексот на трошоци согласно ДЗС и 50% од зголемувањето на просечната плата. И тоа беше формулата по која што истата беше дефинирана. По истиот начин и сега е оваа минимална плата која што ја видовме. Се наметнува прашањето од самиот старт: Кога лажеа синдикатите односно СДС –  Тогаш кога излегоа со кренати раце или денес кога велат дека треба нешто друго да има од производот на формулата што тие самите ја дефинираа?“, вели пратеникот од редовите на ВМРО-ДПМНЕ, Тони Јаревски во гостување во „Студио 10“ на ТВ 24.

Јаревски истакна дека минималната плата не смее да биде предмет на импровизации и наметнувања и додаде дека потребно е да преговараат синдикатите и работодавачите, како што е и основната функција на синдикатот. Тој е дециден дека доколку има договор помеѓу синдикатот и работодавачите, Владата ќе го прифати. Јаревски смета дека барањата треба да бидат реални, а не со политичка заднина, а на штета на работниците.

„Сметаме дека има простор секогаш да се разговара и секогаш може да има и поголема минимална плата. Нека преговараат синдикатите и работодавачите, како што е и во основната функција на синдикатот, со нивните соговорници од работодавачите, доколку се договорат за поголема плата, минимална, Владата тоа ќе го прифати. Тоа е максимално коректно и тоа е производот од економскиот дијалог и совет, и било како импровизации или пак наметнувања и нереални барања надвор од овие што се критериуми и рамка во која што беше јасно дефинирано и како што течеше до сега, е генерално со политички карактер“ , заклучува Јаревски.