Делегацијата Собранието во Парламентарното собрание на НАТО денес во Скопје, беше домаќин на седницата на Постојаниот комитет на ова Собрание. На седницата, која се совпаѓа со одбележувањето на 5 – годишнината од членството на Република Северна Македонија во Алијансата, учествуваа делегации од парламентите на 29 земји членки на НАТО, членови на Бирото, претседатели на комитетите и меѓународниот секретаријат предводен од генералниот секретар на ПС на НАТО. Од Делегацијата на Собранието учествуваа шефот на Делегацијата, Драган Ковачки и заменик-шефот на Делегацијата, Антонијо Милошоски. Настанот, со свои воведни обраќања го отворија шефот на Делегацијата од Собранието Драган Ковачки, Претседателот на Владата Христијан Мицкоски, министерот за одбрана Владо Мисајловски и Претседателот на Парламентарното собрание на НАТО, Маркос Перестрело.
Ковачки, отворајќи го состанокот со топло добредојде до присутните, истакна дека oвој собир има посебно значење бидејќи ја одбележуваме петгодишнината од нашето членство во Алијансата. Во текот на овие пет години, нашата нација остана посветен сојузник, активно споделувајќи ги одговорностите и придонесувајќи за промовирање на мирот, безбедноста и стабилноста во нашиот регион и низ просторот на НАТО. Изрази благодарност за трагичниот настан во Кочани, наведувајќи ги сојузниците кои реагираа брзо, обезбедувајќи критична помош која спаси многу животи. Посочи дека цивилизираниот свет минува низ многу специфични промени и неизвесности и од тие причини единството во Алијансата е неопходно повеќе од кога било. Посака успешен тек на состанокот.
Мицкоски, заблагодарувајќи се за добиената помош, во своето обраќање потенцираше дека нашата татковина исто така во многу наврати ја докажа својата солидарност со останатите држави во светот. И во својот трнлив пат до целта направи многу остапки, многу одрекувања, и многу од нив наидоа на дебата кај граѓаните, некои внесоа оправдано сомневање, но успеавме да истраеме и да ја покажеме нашата лојалност кон вредностите кон кои и понатаму веруваме. Од друга страна, потенцираше дека не секогаш нашата татковина го добивала она што го очекувала, и таквата лојалност спрема нашите заложби се исполнувала. Тоа е чуството кое го има секој еден кон нас и секој еден граѓанин. Пријатели си помагаат, но и пријатели искрено си ги кажуваат своите чуства и забелешки. Наведе дека дека треба да се размисли и за воведување на механизми каде нема да се дозволи билатералните спорови да бидат пречка во остварувањето на колективната и заедничка цел. Ако ние сите заедно ја чуваме куќата, тогаш и заедно имаме право да си ги кажеме нашите проблеми, разочарувања и очекувања. Заклучи дека земјата ќе остане лојален партнер, и заедно и посветено ќе работи кон остварувањето на колективните цели.
Мисајловски истакна дека НАТО не претставува само начин како да се одбранат надворешните граници, туку и заедничките вредности кои се составен дел од нашите општества. „НАТО не е само сојуз на демократии, НАТО е идеал кој се темели на тоа дека само ако сме заедно и здружени, можеме да го одбраниме и зацврстиме нашиот начин на живот во кој секој граѓанин е еднаков, а слободите по секоја основа се гарантирани“, рече Мисајловски. Тој додаде дека во Алијансата грижата едни за други е повеќе од видлива, а доказ за тоа, рече, е понудата од сојузничките земји за безрезервна поддршка и помош по трагичниот настан во Кочани. „Кога целата нација беше во шок, првите повици за сочувство, но и солидарност и поддршка дојдоа токму од моите колеги – министри за одбрана од сојузничките земји. А, за мене нема поголем доказ дека не сме сами. Ние имаме 31 сојузник, имаме вистински пријатели на кои можеме да им се обратиме за помош. Тоа е НАТО. Тоа е сојузништво. Тоа е нераскинливата врска која од 32 земји во Алијансата прави една обединета сила.“ Министерот се осврна и на безбедносните предизвици со кои се соочува континентот, како и на потребата од континуирано вложување во одбраната за што нашата држава одвојува 2 проценти од бруто-домашниот производ и речиси една третина од тие средства за модернизација и опремување на Армијата. Македонските припадници, додаде Мисајловски, со учеството во мултинационалните сили на НАТО во Латвија, Бугарија и Романија, придонесуваат и во безбедноста на источното крило на Алијансата.
Перестрело и честиташе на земјата за нејзиниот јубилеј – 5 години членство во НАТО, со кое како што потенцираше, се зајакна безбедноста на земјата, но и на Алијансата. “За 5 години, Северна Македонија покажа дека е вреден и доверлив сојузник, кој ја исполнува целта за трошење на БДП од 2%, придонесува за одбрана на источното крило, во Бугарија и во Латвија, сојузник кој ја поддржува стабилноста на Западен Балкан преку својот придонес во КФОР и сојузник кој го поддржува суверенитетот и самоодбраната на Украина” наведе Перестрело. Во својот говор ја спомна и солидарноста на НАТО за трагичниот пожар во Кочани, кога петнаесет сојузници дадоа директна поддршка за земјата, вклучитлено и помош во медицинската евакуација. Заклучи дека во периодот кога прославуваме 75 години од постоењето на Алијансата и 70 години од постоењето на Парламентарното собрание на НАТО, треба да бидеме подготвени за одговорност и акција имајжи ги во предвид комплексниот број на закани и предизвици, кои налагаат за сите нас поголемо обединување и зајакнување на нашите капацитети.
По завршување на воведниот дел, состанокот продолжува во затворен формат.
Постојаниот комитет е највисокото раководно тело, чии седници се одржуваат засебно секоја пролет и вообичаено, пред пролетната и годишната пленарна сесија на Парламентарното собрание на НАТО. Во него покрај Претседателот, потпретседателите и благајникот, членуваат шефовите на парламентарните делегации од националните парламенти на земјите членки, како и претседателите на Комитетие и на Специјалната група за Медитеранот и Блискиот исток, кои се екс-официо членови на ова тело. Согласно правилата за работа на Парламентарното собрание на НАТО и доколку не се одлучи поинаку, работниот дел на овие состаноци е од затворен карактер. Одлуките на Постојаниот комитет секогаш претходат на одлуките кои се носат на пленарните седници на Парламентарното собрание на НАТО.
Ова Собрание е мултилатерална организација која воспоставува суштинска врска меѓу НАТО и парламентите на земјите членки, придонесувајќи на свој начин кон спроведувањето на трансатлантските вредности на Алијансата. Составено е од 281 делегат од 32 земји членки на НАТО, како и делегати од асоцијативни земји членки, регионални партнери и од медитеранските асоцијативни земји членки, како и парламентарни набљудувачи од други земји и од парламентарните собранија како ПС на ОБСЕ, ПС на СЕ и делегација од Европскиот парламент.Сабота, 5 април 2025 година
