Отворањето на Уставот за внесување на Бугарите, Хрватите и Црногорците во преамбулата им даде повод на дел од партиите да дадат свои предлози за вклучување делови од други народи што живеат во државата, а не се впишани највисокиот правен акт.
Од Либералнодемократската партија (ЛДП) најавуваат дека ќе предложат амандман со кој ќе бараат и еврејската заедница да биде вметната меѓу деловите од народи наведени во Уставот.
„Ние како партија јасно кажавме дека не е проблем да се дополни Уставот со останатите етнички заедници, а ќе предложиме и наш амандман со кој ќе бараме и еврејската заедница да биде вметната во деловите од народи што стојат во Уставот. Уште кога се спомена дека ќе има уставни измени за вклучување на делови од други народи што живеат во државата, а не се впишани во преамбулата, рековме дека и Евреите треба да бидат вклучени, но не под други народи, туку како делови од еврејскиот народ“,вели пратеничката на ЛДП, Моника Зајкова, во изјава за „360 степени“.
За оваа иницијатива, Зајкова вели дека веќе имале средба со Еврејската заедница и начелно било договорено како ќе оди постапката, но за сите понатамошни чекори ќе се координираат со нив.
„Бидејќи еврејската заедница има долга историја во Македонија, нејзини припадници учествувале во НОБ и во создавањето на темелите на државата, а и бидејќи е извршен холокауст врз таа заедница Македонија чувствува должност да го овековечи споменот за таа заедница со наведување како една од заедниците во Уставот“,објаснува Зајкова.
Пепо Леви, претседател на Еврејската заедница во Македонија, вели дека тоа е нивна желба неколку години, но дека дури сега се создаваат услови за таа да се реализира.
„Имавме контакти со Либералнодемократската партија. Иницијативата постои оддамна, но сега се созреани условите“,вели Леви.
Тој додава дека се почестени од ваквата иницијатива и дека тоа претставува патриотски чин.
„Ние сме македонски Евреи, ние сме партиоти и лојални граѓани и затоа сметаме дека како народ треба да бидеме дел од Уставот“,вели Леви.
Она од што се навредени во последно време се отворањето клубови на Бугарите во државата со спорни имиња.
„Имињата што се ставаат на овие бугарски клубови во Македонија се од фашисти. Затоа поднесовме кривична пријава и во скоро време очекуваме да се покрене постапка и тие имиња да се поништат. Ние не сме против отворање бугарски клубови во Македонија, но не да носат имиња на окупатори“,додава Леви.
Вметнувањето на Бугарите во Уставот е услов за заокружување на т.н. фаза за отворање на пристапните преговори на Северна Македонија со ЕУ, кои почнаа со првата меѓувладина конференција на 19 јули годинава во Брисел. Тоа ја отвора можноста во Уставот да се вметнат и делови од други народи, како Хрватите, Црногорците, а според иницијативата на ЛДП, и Евреите.
За Ковачевски сите граѓани се богатство на државата
Премиерот Димитар Ковачевски, за вклучувањето на делови од други народи во Уставот, уште пред неколку месеци на владина прес-конференција рече дека сите граѓани се богатство на државата и треба да се дел од Уставот.
Ковачевски рече дека нема ништо против уставните измени и внесувањето во Уставот на граѓаните на Република Северна Македонија што јасно се самоопределиле како Црногорци, како Хрвати, како Бугари.
,,И Египќаните се дел од нашето општество кои што придонесуваат и затоа тоа беше поздравено и тие веќе доставија барање за нивно внесување во Уставот на Република Северна Македонија. Меѓутоа зошто би имале тие против доколку и делови од израелскиот народ, односно Евреите во Република Северна Македонија, бидат дел од нашиот Устав, односно од преамбулата на нашиот Устав. Сите тие граѓани се богатството на нашата држава”,рече Ковачевски.
Премиерот, тогаш објасни дека има држави кои што се во соседството, односно во блиското опкружување кои што ги вклучуваат граѓаните со различно самоопределување во својот Устав, односно во преамбулата, изградиле посилни општества и посилни држави.
,,Земете ја на пример Хрватска. Хрватска има 27 делови од народи кои што се дел од нивниот Устав и тие тоа го поддржале и станале членка на ЕУ и се држава која што напредува по сите параметри и економски и општествени и културни”,
рече Ковачевски.
Бугарскиот европратеник Илхан Ќучук, на почетокот на оваа година, рече дека Бугарите не се единствениот народ кој сака да биде запишан во Уставот на Република Северна Македонија. Тоа, вели европратеникот, треба да се случи онака како што налагаат процедурите за измени во Уставот, но ЕУ од друга страна треба да даде и гаранции.
„Не само Бугарите тука, мислам дека и Хрватите и Црногорците, со чии претставници сум имал средби во Европскиот парламент, сакаат да бидат запишани во Уставот на Република Северна Македонија. Тоа треба да се случи на разумен начин и во рамки на националните процедури. Заедно со тоа, ЕУ треба да ги даде неопходните гаранции. Процесот е долг, гледам дека има волја за разговор на темата“,рече Ќучук.
