Во јунскиот уписен рок, првото електронско пријавување на учениците ќе се врши од 14 јуни до 17 јуни. Министерството за образование и наука (МОН) го објави Конкурсот за запишување ученици во јавните средни училишта за учебната 2025/2026 година. Деветтоодделенците ќе може да се пријават електронски, преку линк до системот за електронски услуги на МОН, со посебна најава за средношколци преку сопствените кориснички сметки на schools.mk. Во јунскиот уписен рок, првото електронско пријавување на учениците ќе се врши од 14 јуни до 17 јуни. „Доставувањето на потребната документација до училиштата е на 18 јуни од 8 до 19 часот и на 19 јуни од 8 до 17 часот. Конечната ранг листа со резултатите од запишувањето и слободните места, секое училиште ја објавува на 20 јуни, најдоцна до 12, на јавно место во училиштето и/или на училишната интернет страница“, наведено е во конкурсот.
Онаму каде што ќе има интерес поголем од предвидениот, односно, во оние училишта во кои ќе има повеќе кандидати со одличен успех во споредба со бројот на слободни места, ќе се организира квалификациско тестирање што ќе се одржи на 23 јуни. Конечните ранг листи со резултатите ќе се објават на 23 јуни, на јавно место во училиштето и/или на училишната интернет страница. Второто електронско пријавување на учениците ќе се врши на 30 јуни. Доставувањето на потребната документација до училиштата е на 01 јули од 10 до 19 часот. „Конечната ранг листа со резултатите од запишувањето и слободните места, секое училиште ја објавува на 2 јули, најдоцна до 12 часот, на јавно место во училиштето и/или на училишната интернет страница. Извор: Новинска агенција МЕТА
