Hе смее да се дозволи одлуките на обвинителството да се користат за дневно-политичко поентирање, посебно ако се има предвид дека секоја донесена одлука влијае на нечија човечка судбина, се вели во соопштението од ОЈО. Јавните обвинители од Основното јавно обвинителство за гонење на организиран криминал и корупција ги отфрлаат сите информации што кружат во јавноста за наводни притисоци врз нив во врска со предметите по кои постапуваат и јавно ги осудуваат ваквите изјави што задираат во нивниот интегритет, реагираат денеска оттаму. „Во досегашното работење на сите обвинители во ова обвинителство, без исклучок, во ниту еден момент ниту од Основниот јавен обвинител Ислам Абази, ниту од кој било друг не била загрозена нивната самостојност и одговорност при извршување на нивната функција.
Принципот на хиерархија и субординација, на кои се темели функционирањето на јавното обвинителство, не задира во независноста при одлучувањето на јавните обвинители кои мериторноста на своите одлуки ја црпат од прибраниот доказен материјал, па така секоја непроверена теза и сензација која ја подрива довербата во обвинителството директно го крши Уставот на РСМ“, наведено е во реакцијата на ОЈО. Оттаму потенцираат дека јавноста треба да знае дека согласно Уставот на РСМ и согласно законите никој не може да влијае врз законитото, непристрасното и објективното вршење на функцијата на обвинителството. „Од тие причини не смее да се дозволи одлуките на обвинителството да се користат за дневно-политичко поентирање, посебно ако се има предвид дека секоја донесена одлука влијае на нечија човечка судбина“, се вели во соопштението од ОЈО. Извор: Новинска агенција МЕТА
