Не е точно дека децата во Македонија примаат „секакви експериментални“ вакцини, како што тоа сака да го прикаже објавата. Министерството за здравство на страницата за информации околу вакцините и задолжителната имунизација, наведува дека вакцините кои се регистрирани за употреба во нашата земја, се истите кои се користат во сите европски земји. Исто така, С. Македонија нема склучено никаков договор со фондацијата на Бил Гејтс, а уште помалку за некакви експериментални вакцини кои им се даваат на нашите деца, како што тоа неосновано го тврди објавата, пренесува Вистиномер. Анализираме објава на Фејсбук која објавува фотографија од Бил Гејтс и вели:
Родители!!! Нашата влада потпиша договор со овој психопат вашите дечиња да ги боцкаат со секакви експериментални вакцини на психопатов ова мора да се сопре да ги заштитиме дечињата.
Не е точно дека децата во С. Македонија примаат „секакви експериментални“ вакцини, како што тоа сака да го прикаже објавата. Согласно календарот за имунизација и годишната програма за имунизација, задолжителна имунизација се спроведува против следните болести: вирусна жолтица Б (Hepatitis B) туберкулоза (Tuberculosis), заболувања предизвикани од хемофилус инфлуенца тип Б (Хиб), дифтерија (Diphteria), тетанус (tetanus), голема кашлица (Pertusis), детска парализа (Poliomyelitis acuta), мали сипаници (Morbilli), заушки (Parotitis) и црвенка (Rubeolа) и заболувања предизвикани од хуман папилома вируси (ХПВ). Имунизацијата е бесплатна за сите лица од 0-18 години без разлика на здравственото осигурување.
Придобивките од вакцинацијата се многубројни и вакцините се најголемото достигнување на медицината. Таа обезбедува здраво поколение, придонесува за колективниот имунитет, го спречува ризикот од заболување, ги намалува трошоците за боледување и лекување, спречува инвалидитет и други последици, спречува смртност од заболувањето, создава отпорност на организмот кон заболувањето и спречува епидемии од заразни болести. Министерството за здравство на страницата за информации околу вакцините и задолжителната имунизација, наведува дека вакцините кои се регистрирани за употреба во нашата земја, се истите кои се користат во сите европски земји. Повеќе информации за името на производителот, производот и датумот на одобрување на вакцините може да се најдат во Регистарот на лекови. На пример, вакцината против пертусис, е од производителот „Санофи Пастер“ од Франција. Регистрирана е во МАЛМЕД. Станува збор за шестовалентна вакцина. На линкот погоре се наведени сите возможни информации за вакцината, производителот, што таа содржи, упатство за користење итн.
Друг пример е МРП вакцината ММР Вакспро, произведена од „Мерк, Шарп и Доме“ Холандија (Merck Sharp & Dohme), со производствени капацитети во Германија и САД. Од истиот производител е и рота вакцината. Буквално сите вакцини од задолжителниот календар за имунизација имаат детални описи на тоа што содржат, дозирање, збирен извештај, упатство за употреба, претставништва преку кои се набавени во земјава и се разбира, сите имаат одобрение од МАЛМЕД, единствената овластена државна агенција која има право да им даде дозвола. Понатаму, сите вакцини како и сите лекови воопшто, подлежат на систем на фармаковигиланца. Тоа значи дека доколку се јави несакан ефект, тој се пријавува во МАЛМЕД каде има оддел што ги следи несаканите ефекти. Доколку нешто со вакцините не било во ред, овој оддел досега тоа ќе го детектирал и тоа би било детектирано на светско ниво, што се разбира се нема случено.
ХПВ вакцината што се администрира во Македонија се вика Гардасил и ја произведува холандски „Мерк“. Вакцината против пневмококни инфекции се вика Превенар и ја произведува „Фајзер“, во производствен капацитет во Белгија. Точно е дека вакцините се увезени од странски европски држави и пред да дојдат во земјава подлежат на ригорозна контрола. Некои од нив се користат со децении. Наспроти изнесеното во објавата што ја рецензираме, вакцините се сериозно испитани, сигурни и проверени, а одобрението во С. Македонија го добиваат врз основа на документи за таа испитаност и провереност.
Нема потреба да бидете загрижени за потеклото на вакцините. Без разлика на земјата на производство, вакцините поминуваат низ ригорозен процес на одобрување и регулаторен процес пред да се стават во употреба. Бидете сигурни дека вашите деца се вакцинирани според националниот календар за имунизација во соодветна здравствена установа или во рамки на кампањите за имунизација што ги спроведува Министерството за здравство, пишува на страницата на УНИЦЕФ.
Според УНИЦЕФ вакцините спасуваат 2 до 3 милиони деца од опасни болести секоја година. Бројот на деца кои се соочуваат со парализа како последица на полио, е намален за повеќе од 99 проценти од 1988 година. Вакцините против мали сипаници овозможија да се избегнат повеќе од 23 милиони смртни случаи помеѓу 2000 и 2018 година.
Што се однесува до фондацијата на Бил Гејтс ГАВИ, таа е вакцинална алијанса и не е приватна организација на Бил Гејтс. Иако Мелинда и Бил Гејтс Фондацијата ги обезбеди првичните средства во износ од 750 милиони долари за организацијата, основачи се и УНИЦЕФ, Светската банка и Светската здравствена организацација. ГАВИ има многу донатори (56 држави и 63 светски компании) и целта е собирање средства за вакцини за потребите на земјите со најниски приходи, кои сами не можат да ги обезбедат неопходните пари. Но, ако средствата се соберат заеднички, тогаш може да се пристапи пред производителите со големи нарачки со што се намалува единечната цена на вакцините. Од 2000-та година до денес, ГАВИ има помогнато да се вакцинираат над 981 милион деца, при што се спречени 16,2 милиони смртни случаи со што е преполовена смртноста кај децата во 73 земји со ниски приходи.
Во 2018 година имаше најави дека Македонија била кандидат да влезе во проектот на Бил и Мелинда Гејтс за донација на деветовалентна вакцина против ХПВ. Тогашниот министер за здравство Венко Филипче кажа дека проектот се спроведувал преку фондацијата на американскиот милијардер и неговата сопруга и со него ќе биде опфатена по една земја од секој од петте континенти. Во 2021 година лекари алармираа дека нема вакцини против ХПВ и тогаш сè уште се зборуваше за четиривалентната вакцина, што значи дека Македонија не потпишала договор во 2018 година со ГАВИ за донација на деветовалентната вакцина против ХПВ.
Деветовалентната вакцина пристигна во Македонија во април 2024 година. На прес-конференцијата која тогаш ја одржаа тогашниот министер за здравство Илир Демири и тогашната националната координаторка за имунизација, проф. д-р Александра Грозданова, заедно со претставници на УНИЦЕФ и УНФПА, фондацијата на Бил Гејст воопшто не беше спомната, што значи дека С. Македонија нема склучено никаков договор со оваа фондација, а уште помалку за некакви експериментални вакцини кои им се даваат на нашите деца, како што тоа неосновано го тврди објавата што ја анализираме. Што се однесува до деветовалетната вакцина против ХПВ, истата е безбедна и за неа Вистиномер веќе им пишувано во поширока анализа. Од сето погоре можеме да заклучиме дека објавата е невистинита.
