Хрватската Агенција за цивилно воздухопловство денеска соопшти дека неодговорната употреба на дрон ја загрозила безбедноста на патничкиот воздушен сообраќај, поради што два авиони не слетале на аеродромот во Дубровник. Агенцијата предупреди дека казната за оние кои со дронови ја загрозуваат безбедноста на воздушниот сообраќај е до 20.000 евра. „Во непосредна близина на аеродромот во Дубровник, при последната подготовка за слетување во недела на 13 април, евидентирано е опасно приближување на дрон кон патнички авион на приближна висина од 200 метри, при што пилотот на дронот со неодговорно однесување ги загрозил животите на екипажот и патниците, како и животите и имотот на луѓето на земјата“, се вели во соопштението.
Екипажот на авионот препратил преставка до Хрватската контрола на летање, која ги известила надлежните полициски органи одговорни за спроведување на истрагата. Аеродромот Дубровник извесно време беше затворен поради инцидентот, два авиони кои требаше да слетаат беа пренасочени кон аеродромот во Сплит, а неодговорниот пилот на дрон предизвика значителна штета на превозниците и патниците. „Ваквите пореметувања можат да имаат кумулативен ефект врз целото планирано работење на вклучените превозници, со директна штета која се движи од 15.000 до 190.000 евра по пренасочен лет. Индиректната штета предизвикана на патниците во форма на пропуштени обврски често не може да се изрази во пари“, се вели во соопштението.
Агенцијата за цивилно воздухопловство предупреди дека летање дронови во близина на аеродроми и во контролиран воздушен простор е дозволено во случаи кога тоа е одобрено од надлежната контрола на летање, пренесува Танјуг. „Доколку се врши неовластено и незаконски, може да биде крајно опасно за безбедноста на воздухопловот, екипажот, патниците и лицата и имотот на земјата. Ваквите активности се казниви и повлекуваат прекршочна и кривична одговорност“, предупредуваат од Агенцијата.
