За да ја засилат мобилизацијата на фронтот, властите во Украина постепено ги менуваа законите и ги заоструваат критериумите. Руските функционери и пропагандисти често зборуваат за проблемите на Киев со мобилизацијата, често пренесувајќи невистинити содржини на оваа тема, како што е впрочем случај и со објавата што ја рецензираме. Рецензираме објава на социјалната мрежа Фејсбук во која пишува: Семејството на украински војник на неговата надгробна плоча напиша „НЕЛEГАЛНО МОБИЛИЗИРАН “! Украинскиот суд нареди да се отстрани „навредливиот текст во рок од 5 дена од надгробната плоча“. Имаат рок до 7 април 2025 година да го сменат натписот на надгробната плоча. ЗОШТО НАВРЕДЛИВ ТЕКСТ ЗА УКРАИНСКИОТ СУД ???
Како што пишуваат проверувачите на факти на Делфи, осврнувајќи се на истата фотографија од објавата што ја рецензираме со надгробен споменик и напис на него „нелегално мобилизиран“, оваа фотографија првпат се појавила на про-Кремљ каналите на Телеграм, заедно со уште една фотографија (наводна судска пресуда во која што „на мајката на момчето ѝ се наредува да го тргне натписот дека момчето е нелегално мобилизирано“) која може да ја видите во продолжение.
Алатката за проверка на фотографии Forensics покажа дека натписите на споменикот се изработени со уредувач на фотографии. Во лажниот документ се наведува и дека „пресудата“ е издадена од Окружниот суд во Киев во Бровари на 31 март 2025 година. Користејќи ја услугата YouControl, „Стоп Фејк“ ги провери сите судски одлуки за овој датум и, како што се очекуваше, не најде таква пресуда, пишуваат проверувачите на факти од Украина. Уште еден показател дека објавата што ја рецензираме е невистинита е и тоа што во пресудата како наводен „тужител“ се наведува општинско претпријатие „Бровари ритуал сервис“ кое наводно „ја тужело мајката за натписот на надгробната плоча дека синот ѝ бил нелегално мобилизиран“.
Тоа претпријатие контактирано од „Стоп Фејк“ потврди дека станува збор за дезинформација. „Ние не закопавме таков војник. На фотографијата не се нашите гробишта и никого не тужиме“, изјавил правниот советник на компанијата за „Стоп Фејк“. Според проверувачите на факти од Украина, оваа дезинформација е измислена за да ја дискредитира мобилизациската кампања во Украина и да го подели украинското општество. Претседателот на градскиот совет на Бровар, Игор Сапожко, на својата Фејсбук страница напиша дека војник со име Григориј Олејник (како името на надгробната плоча од фотографијата) не е ниту на списокот на загинатите ниту меѓу погребаните на Алејата на славата во Бровари. Во базите на податоци на загинатите украински војници нема војник со тоа име и датум на смрт. Фотографијата од наводната надгробна плоча на починат украински војник стана вирална на 2 април. На плочата е изгравиран портрет на маж, името Григориј Вјачеславович Олејник, датумите на раѓањето и смртта и потпис „нелегално мобилизиран“ на украински.
За да ја засилат мобилизацијата на фронтот, властите во Украина постепено ги менуваа законите и ги заоструваат критериумите. Руските функционери и пропагандисти често зборуваат за проблемите на Киев со мобилизацијата, често пренесувајќи невистинити содржини на оваа тема, како што е впрочем случај и со објавата што ја рецензираме. Постоењето на надгробна плоча на починат украински војник со натпис „Нелегално мобилизиран“ и судските постапки кои произлегуваат од тоа не се поткрепени со податоци од авторитетни, кредибилни извори, пишува Делфи. Текстот на судската одлука содржи бројни грешки и неточности, документот не е јавно достапен на страницата за судски одлуки, компанијата која е наводен „тужител“ во неверодостојниот документ негира учество во судски процес. Поради сите горенаведени факти објавата што ја рецензираме ја оценуваме како невистина. Извор: Новинска агенција МЕТА
