Премиерот Димитар Ковачевски се обрати на настан по повод новата инвестиција на германската компанијата „Кил Македонија“. Станува збор за изградба на нов производствен капацитет во Технолошко индустриската развојна зона во Тетово.Во продолжение ви го пренесуваме обраќањето на премиерот Ковачевски во целина:„Странските инвестиции во Северна Македонија, растат го зголемуваат производството, извозот, вработените. Тоа е накратко она што го гледаме во сите изминати недели ширум државата, во сите индустриски зони.Германската инвестиција, компанијата „Кил Македонија“ која веќе успешно работи 6 години во нашата земја, тука во Желино, реализира нова инвестиција во изградба на нов производствен капацитет во Технолошко индустриската развојна зона во Тетово.Во моментот над 130 наши сограѓани работат во оваа компанија од автомобилската индустрија и произведуваат иновативни транзитни патнички седишта за комерцијални возила и јавен превоз. Успешниот раст на компанијата доведе до потреба за дополнително проширување на производствениот капацитет и нивното портфолио и поради успешниот проект во Северна Македонија тие инвестираат нови 9,2 милиони евра во изградба на нов производствен капацитет во ТИРЗ Тетово, а тоа значи нови 150 работни места, со очекуван вкупен извоз од над 160 милиони евра во наредните 10 години.Почетокот на производството од новата фабрика се планира во 2023 година.Големо е задоволството кога во услови на најголемата економско-енергетска криза, Северна Македонија е дестинација за нови инвестиции на водечки производители како меѓународната „Кил Групација“, која работи глобално со производствени погони во САД, Германија, Полска, Холандија и во Турција, а присутна е и на азиските пазари. Високо технолошки компании инвестираат во земјата и носат нова додадена вредност на нашата економија.Ова за нас како Влада е уште една потврда дека нудиме стабилен деловен амбиент, и пред сé предвидлив за компаниите да може да ги реализираат своите долгогодишни планови. Оваа инвестиција, исто така е резултат на новиот концепт на Владата и ТИРЗ за привлекување на странски инвестиции за што секој потенцијален инвеститор задолжително доставува 10 годишен инвестициски план врз база на кој се проценува капацитетот на компанијата и инвестицијата и се подготвува индивидуализиран пакет за учество на државата во инвестицијата.Економските политики и Планови на Владата даваат резултати. Ние сме земја членка на НАТО, со почнати преговори за членство во ЕУ, стабилен партнер за вложување на инвестициите на компаниите од Европа и светот. Потврда за тоа се и постоечките инвеститори кои работа во нашата земја, од САД, Канада, Франција, Германија, Турција и бројни останати европски земји кои ги споделуваат можностите за инвестиции во нашата земја и условите за раст и развој на компаниите.Оваа Влада е силно фокусирана на економијата, деноноќно работиме на ублажување на последиците од енергетската криза, а при тоа паралелно и на сите можности за раст на инвестициите и за нови вработувања. Тоа е клучот за борбата со енергетската криза, од која верувам дека сите ќе излеземе посилни и порационални.И во овие тешки кризни времиња, наша задача е да обезбедиме услови за креирање нови работни места, но секако и на подобро платени работни места за да се справиме со растечките трошоци за живот. И тука во германската инвестиција во „Кил Македонија“, просечната нето плата е над државниот просек.Само од неколку нови инвестиции кои ги објавивме изминативе неколку месеци се отвораат нови над 1.700 работни места. Да бидам попрецизен од заедничката инвестиција на „Јангфенг“ и „АРЦ Аутомотив“ ќе се отворат 100 нови работни места, ја отворивме и втората фабрика на американската компанија „Кемет Електроникс“ во ТИРЗ со нови 360 вработувања, канадската „МАГНА“ во зоната во Струга со над 1.000 вработувања, турската инвестиција „ТЕКНОПАНЕЛ“ со која ќе се отворат 120 нови работни места, како и денешната нова инвестиција на германската „Кил“ со околу 150 нови вработувања.Дополнително, само во првите десет месеци од годинава во компаниите во ТИРЗ се отворени над 2.000 нови работни места, а бројот на вработени за првпат се искачи над 16.000. Во моментов ТИРЗ има помеѓу 30-35 активни клиенти.Со новиот концепт на ТИРЗ и Владата за привлекување инвестиции само во изминатите 18 месеци се постигнати договори од 620 милиони евра што е речиси две третини од вкупниот обем на донесени инвестиции во претходните 10 години.Јас не би должел многу сакам да се заблагодарам само на менаџментот на компанијата „Кил“ што направи чест да дојдеме тука на отворањето заедно со моите колеги од Владата, заедно со г. Ахмети, почитуваната амбасадорка на Германија.Сакам на инвеститорите да им посакам успешна работа, успешна работа на сите вработени заедно со нивниот менаџмент тука во оваа фабрика, бидејќи вработените се клучот за успех на секоја компанија. Успешна реализација на сите планови кои што ги има менаџментот на компанијата.“
