Администрацијата на Бајден подготвува поголем пакет воена помош од нормалниот за Украина, кој ќе вклучува и оклопни возила, покрај итно потребната артилерија и противвоздушна одбрана.
ретставниците на Министерството за одбрана сè уште ги ставаат завршните точки на потенцијалната нова транша, но сакаат таа да биде подготвена кога претседателот Џо Бајден ќе го потпише нацрт-законот за обезбедување на десетици милијарди долари дополнителна помош за Киев, соопштија официјалните лица, пренесува „ПОЛИТИКО“.
Сенатот се очекува да го усвои законот и веднаш да го испрати до Бајден.
Пакетот сега ќе биде значително поголем од најновата транша од 300 милиони долари. Двајца американски официјални претставници рекоа дека тој ќе вклучува оклопни возила, меѓу нив и борбени возила Бредли.
Во пакетот се очекува да има и постари оклопни транспортери Хамви и М113, како и проектили.
Администрацијата подготвува „голем пакет за да помогне во задоволувањето на потребите на бојното поле на Украина“, рече анонимен американски официјален претставник, додавајќи дека тој ќе вклучува и артилерија и противвоздушна одбрана.
Портпаролот на Пентагон одби да ги коментира ваквите наводи.
Пентагон испрати само еден пакет помош за Украина од декември, кога снема средства за испраќање дополнително оружје од своите резерви.
Зеленски го поздрави долго одложуваното гласање на Домот во саботата за одобрување дополнителни средства, велејќи на социјалните мрежи дека тоа ќе спаси животи.
Покрај помошта, „ПОЛИТИКО“ во саботата објави дека САД размислуваат да испратат дури 60 воени советници во Киев за да го олеснат дојдовниот трансфер на оружје додека ја поддржуваат украинската влада.
Највисоките американски претставници неодамна предупредија дека Русија добива на интензитет бидејќи на украинските војници им снемува муниција на фронтот.
Директорот на ЦИА, Бил Барнс, минатата недела им рече на пратениците дека без ново американско оружје, Украина може да ја загуби војната до крајот на годината.