„Тие се опозиција на опозицијата, кога ги гледате нивните изјави и објави, гледате една страшна опседнатост со дејствувањето на ВМРО-ДПМНЕ, која е главна опозициска партија. Доколку сите велиме дека главниот проблем во државата се СДСМ и ДУИ, тогаш логично би било ние да разговараме за опозициско обединување и како да ја срушиме оваа власт, но гледате подолг период, ова е нешто што во континуитет се случува“вели Муцунски.
Според него, во демократија е дозволено се и добро е што на изборите ќе има широк спектар на кандидати. Сепак, убеден е дека во текот на кампањата и по дејствувањето на кандидатите граѓаните ќе осознаат повеќе за партиите кои стојат зад кандидатите.
„Едно е вие да настапувате со свои автентични ставови и да кажете за што стоите, кои се вашите ставови за оние круцијални прашања од внатрешна и надворешна политика, но јас гледам во последните недели изјави фокусирани за личности дали е тоа Мицкоски, дали е Силјаноска-Давкова, дали Муцунски, Пецаков, да ги наброиме сите понатаму на кои гледаме сериозен фокус од Левица и од нивниот кандидат, но не гледам став со кој би привлекле гласови“кажа Муцунски.
Кога станува збор за внатрешните превирања во политичката партија Левица, на новинарско прашање дали нападите на Левица можеби серезултат на тоа што таму препознаваат „замешателство“ на ВМРО-ДПМНЕ, Муцунски вели дека процесите во Левица говорат за тоа во каква состојба е таа партија, но и за луѓето кои ја раководат.
„Тоа што можам да го кажам од мое лично искуство, но и од партиско и професионално искуство, е дека отсекогаш Левица имала проблем со ВМРО и со раководството на ВМРО-ДПМНЕ, а ние немаме проблем со нив. Имаат право автономно да си дејствуваат, но би сакале да видиме став од нив не само против што се, сите знаеме кои се негативните состојби во општеството и што се прави лошо од актуелната власт, но добро е наместо да се занимаваат со опозицијата да почнат да нудат конкретни предлози и решенија“вели потпретседателот на ВМРО-ДПМНЕ и градоначалник на Аеродром.