Премиерот Ковачевски на прес-конференцијата оцени дека „Француското претседателство во ЕУ беше клучно на нашиот европски пат“ и дека Република Северна Македонија продолжува да работи на остварувањето на оваа државна стратешка цел. Во продолжение Ви го пренесуваме во целост обраќањето на премиерот Ковачевски на прес-конференцијата:
„Драго ми е што денес, со г-ѓа Бун, разговаравме за нашата европска иднина, за отпочнатите преговори, отпочнатиот скрининг, за напредокот, за потпишаниот Договор со ФРОНТЕКС, за конкретни реформи, а не зборуваме дека сето ова треба да се случи во иднина. Разликата е огромна и видлива. На 19 јули ги отпочнавме преговорите со ЕУ ја одржавме првата меѓувладина конференција. На 15 септември започна скрининг процесот. На 26 октомври го потпишавме договорот за ФРОНТЕКС кој е прв документ на кој имаме ставено потпис заедно со сите останати 27 земји членки на ЕУ, на македонски јазик, без никакви додавки, ѕвездички и фусноти.
Ова се три датуми кои остануваат врежани во македонската историја како денови кога ние добивме целосна потврда за нашите заложби за европска иднина и кога добивме потврда дека македонскиот јазик е заштитен и е на исто рамниште со останатите јазици на Европската Унија. Започнато е ново поглавје во нашиот европски пат, на кој треба да се случат и понатамошните реформи и трансформацијата на општеството со што ќе ја оствариме нашата стратешка цел – а тоа е полноправното членство во ЕУ.
Оваа Влада, донесе многу тешки одлуки, но со тоа покажа визија, лидерство и храброст. Отворањето на преговорите реално значи можност за подобра, побогата иднина, подобар животен стандард за граѓаните, можност, идните генерации да живеат во земја членка на ЕУ, но тоа наместо да биде во некоја друга земја, да биде тука, дома, во Северна Македонија. Процесот на преговори беше мачен и тежок, знаете и самите, но фактот дека ние од тој процес излеговме како земја која успеала да се избори за своите позиции и да остане доследна на она кое го има зацртано, она на кое нѐ обврзаа граѓаните преку Собранието, ме прави навистина горд.
Успеавме да се избориме за заштита на македонскиот јазик, на македонскиот идентитет, се изборивме за историските прашања да разговараат експерти, а не политичари и успеавме да ги одблокираме сите процеси кои нѐ кочеа толку долго време. Успеавме конечно да започнеме со реалната трансформација на општеството преку скрининг процесот, на кој сме навистина посветени да го завршиме во рокот кој го зададовме на почетокот. Македонскиот тим е подготвен, има експертиза, знаење, и ќе го заврши скринингот во планираниот период од 14 месеци.
И ние и ЕУ ги исполнуваме нашите ветувања. Останува следниот чекор, уставните измени, кои ќе се најдат пред македонското Собрание и нашите 120 пратеници. Знам дека нивната одлука нема да е лесна, но очекувам дека ќе покажат државничко однесување и ќе овозможат земјата да се движи забрзано по европскиот пат. Секако дека тие имаат избор да остават да биде се така како што било и да ја остават земјата во стагнација и неизвесност, но верувам, уверен сум, дека тие ќе бидат на ниво на задачата и ќе донесат одлука со која ќе се овозможи подобра иднина, за идните генерации, за нас, за нашите деца.
Пратениците се сепак и пред сѐ претставници на граѓаните, а граѓаните сакаат да живеат во земја членка на ЕУ. Сакаат да сме полноправна членка. Но не затоа само заради членството само по себе, туку заради подобар животен стандард, заради подобро владеење на правото, подобра инфраструктура, подобри услуги за граѓаните, заради економски напредок, социјална правда, и владеење на демократија. Заради подобар живот по европски стандарди. Затоа што сакаат децата да им останат дома и тука да си ја градат иднината.
Полноправното членство во ЕУ е нашата цел и ние немаме друга алтернатива. Патот до ЕУ нема да е лесен, но мора да се изоди. Затоа што на крајот на тој пат е големата награда, полноправното членство во ЕУ. Нашите граѓани, идните генерации ќе живеат во ЕУ, горди што се Македонци, со крената глава, со македонски јазик, со македонски идентитет, но она што е најважно, побогати и со подобар стандард од тоа што го имаат сега.
За тоа се доказ сите земји членки кои пред многу години биле во нашата ситуација, а кои по членството во ЕУ доживеале сериозен раст и развој и денес нивните граѓани ја имаат шансата да живеат во земји со подобар стандард, да се побогати, да ги остваруваат сопствените потенцијали целосно, да живеат европски и слободно. Дали ќе бидеме и ние таму, сега зависи само и единствено од нас. Овие подадени раце на поддршка од нашите пријатели, оваа шанса која ја имаме, не смееме да ја пропуштиме.
Европската Унија во овој процес се покажа како партнер од доверба и ги исполни и своите ветувања. Ние последно, добивме поддршка во форма на грант од 80 милиони евра кои Северна Македонија ќе ги искористи за справување со економско енергетската криза. Оваа поддршка доаѓа затоа што ЕУ препозна дека ние сме одговорна влада која одговорно менаџира со буџетот. Токму со тој пристап ние изминатиов период можевме ги вратиме парите на граѓаните кога е тоа најмногу потребно и да обезбедиме два пакети антикризните мерки заштита на најранливите граѓани и за заштита на компаниите во вредност од над 760 милиони евра.
Токму затоа можевме да обезбедиме и ликвидност на компаниите со што ги заштитивме работните места, а и континуирано да обезбедуваме 80% субвенционирана струја како и евтина струја за да има непречено функционирање на виталните функции на државата. Со последните мерки за обезбедување евтина струја за прехранбената индустрија, очекуваме и да се намалат цените на лебот, млекото, брашното и другите основни прехранбени продукти за најмалку 10% и да го заштитиме стандардот на граѓаните.
Токму со такво одговорно однесување, изминатиов период обезбедивме и зголемување на минималната плата на 18.000 денари, зголемување на пензиите, на платите во образование, во полиција, во здравството, да обезбедиме континуирано зголемување на просечната плата. Со истиот овој одговорен пристап но и со визија за иднината ние пристапуваме и кон енергетската трансформација која ни е толку многу потребна особено во ова време на недостаток на енергенси.
ЕУ и тука ја нуди својата поддршка и ќе е партнер од доверба, обезбедувајќи можност за развој на проекти во енергетскиот сектор. Јас често зборувам за големите стратешки енергетски проекти, кои што во моментов се преговараат во Владата со стратешки партнери од странство и еден од најголемите од нив доаѓа токму од Франција, АКУО кој е заинтересиран за изградба на голема фотоволтаична централа од 400МВ во регионот на Штип.
Со правилна поддршка и правилно менаџирање, јас сум уверен дека можеме да ја трансформираме нашата прекрасна татковина во хаб на зелената енергија и да обезбедиме и енергетска независност, но и да го снабдуваме регионот со струја од обновливи избори. Ова е иднината, и не е недостижна. Ние веќе ги преземаме првите чекори и уверен сум дека ќе ја оствариме нашата визија и ќе обезбедиме вложување во индустриите на иднината кои ќе ни донесат повеќе работни места, подобро платени работни места, ќе ни донесат подобра заедничка иднина.
Ви благодарам и уште еднаш упатувам благодарност и до Франција и француското претседателство со ЕУ во текот на оваа година и до државниот секретар, г-ѓа Бун“. Државната секретарка за Европа на Француската Република, Бун, на прес-конференцијата, како и на билатералната средба, порача дека Република Северна Македонија заслужува да биде дел од Европската Унија.
„Работевме заедно за европските перспективи затоа што тоа го заслужувате. Сакаме да останеме со вас и во следните етапи, за постигнување на оваа цел“, рече државната секретарка за Европа, Бун, на прес-конференцијата. Таа оцени дека Република Северна Македонија е столб на стабилноста во регионот. Исто така го нагласи значењето на договорот со ФРОНКЕТС, потпишан и на македонски јазик, за што на средбата е констатирано дека е силно признание од страна на ЕУ.
На средбата е исто така констатирано дека Франција секогаш била присутна во клучните историски моменти во нашата држава, дека е воспоставена соработка во рамки на одбраната со којшто ќе се зголемат капацитетите на одбраната на нашата држава, дека односите меѓу двете држави се продлабочени на историско ниво и со лично заложување на претседателот Макрон и дека Француската Република е определена за продлабочување на односите со Република Северна Македонија и на политички и на економски план.
